A Pianist, Writer and Lawyer, Debra w.

My Life Story 

1. 童年 

鋼琴方面，我覺得自己比較特別之處，係我細個一D都唔勁。

我爸係小學教師，佢鼓勵我睇課外書，支持我發展自己既興趣。我小學二年班時，我爸到租書店租金庸小說俾我睇，我一睇即愛不釋手，小學時代已經睇晒全部金庸，睇到入晒腦，大個每過一排就會翻睇。

至於鋼琴方面，我爸話我兩歲幾已經在玩具鋼琴自己彈出兒歌，覺得我有天份，4歲幾就送我去琴行學琴。

我就好似大部分小朋友一樣，隔兩年考一次試，平均一年一級咁上。 但去到4，5級，D歌開始悶（對當年的我黎講），我就開始冇心機練琴。到考完5級僅僅得pass，我老豆覺得個老師可能不太適合我，決定幫我再搵過個老師。 

新老師係大陸音樂學院畢業，好注重基本功，人又嚴肅有要求。喺佢既教導下我進步快左好多，考7級既時候終於攞返個merit。之後又有機會在老師既學生音樂會中演出，發覺自己都幾鍾意表演，自信心都一直增加，到考8級果陣終於考到人生第一個distinction。

2. 志向 

考完8級之後我先至真正開始鍾意彈琴。我決定將來要去讀音樂學院，我老師好支持我，我爸就同好多香港家長一樣，覺得讀音樂又辛苦，又搵唔到食，叫我唔好讀。

但在我既堅持下，我爸頂唔順我既疲勞轟炸，終於讓步，話如果我會考考得好，可以俾我去演藝學院讀兩年試下（佢既用詞係「過下癮」），但之後要出返黎讀A level 再報大學。 

我既鋼琴老師推介我跟黃懿倫老師（香港既「殿堂級」名師），仲幫我邀請黃老師黎睇我表演，最終我亦如願以償成為佢既學生。 

之後果段時間，就好似武俠小說裡面剛剛拜師入門（仲要係帶藝投師）既徒弟咁，一開頭完全顛覆認知，全部野差不多要砍掉重練，起初以為好簡單既野，原來當中有咁多學問。

唔知大家有冇見過果條Kruger Dunning 果條自信心既 curve - 當我發現原來自己仲有咁多野要學，同埋自己同師兄師姐既距離咁遠，我開始懷疑自己是否做得到最初的目標。到讀完diploma畢業時，我決定不再升上degree，遵守返同我爸的約定，真係出返去讀中六。 

點知當我唔再係music student 之後，冇左果種心理壓力，彈琴突然覺得放鬆左好多，有D之前做唔到既野，突然又得左喎！

之後我入左中大英文系，再副修音樂，跟到紀大衛教授學琴（以music minor身份跟佢既人幾乎係絕無僅有），再考埋LRSM同FRSM（兩次都distinction），又覺得要再俾多次機會自己，就報左Royal Academy of Music 既postgrad課程。

3. 事業、移民

結果我入左RAM之後，又再喺London一間law school 讀埋part-time GDL (又稱CPE，係俾有non-law學位既人讀既conversion course)，兩個course 同時畢業之後就返左香港讀PCLL，再經過實習正式成為執業大律師。 

因為之後差不多馬上結婚，然後好快就有小朋友，小朋友出世後都盡量自己湊，所以其實真正做case的時間不是很多。雨傘革命後因為唔睇好香港前境，就決定放棄大律師的工作，開始有移民的想法。

RAM畢業後一直有part-time教琴，主力教成人，見到好多學生都係因為唔識得正確既方法所以技術限制左佢地既發展，所以我既教學內容大部分都係環繞技術，技術改善左、人放鬆左，音樂表現力自然會改善。 

類似既野講得多，就開始諗點樣將佢歸納成一套方法寫出黎。 於是就催生左第一本《從技巧到音樂》。

2019年後移民計劃加速，2020年我自己一個先過來準備，然後因為lockdown、封關，家人推遲落腳日期，我足足有一年時間自己一個人住，中間練琴又有新發現（去到只要用耳仔聽，所有野就會變全自動的境界），同埋又再翻睇一次全部金庸，有一日又諗到，原來裡面好多武功「秘訣」，又可以套用喺鋼琴上面。 

結果又寫左一本《從音樂到技巧》，搵到出版社（「香港人在英國」版主果間）幫我在香港出版及發行。

呢兩三年花在教學上既時間少左，但在演奏上係多左，雖然同當年想像既career path 好唔同，但當年完全想像不到有一日會去到依家既功力/境界，所以已經十分滿足，畢竟我最喜歡、性格最似既金庸小說人物係令孤沖 - 一個鍾意自由自在，最憎扮野既浪子... 咩都冇所謂，最緊要好玩😜

4. 852X! 

舊年突然有個諗法，想在附近搵人夾下band（之前在香港一次都未試過正式夾band），就去local whatsapp group（包括2手谷！）搵人，出乎意料之外地好快搵到一班band友，有D仲係專業音樂人 - 呢隊band 就係852X啦～ 

話咁快隊band 已經差不多成立一年。呢一年裡面我地好幸運地有好多出show機會，好多年冇聽cantopop既我，因為咁又認識左好多廣東歌同歌手，又同呢班band友一齊出生入死/醉生夢死 😆 每次夾band都好開心～

黎緊Hong Kong Reading Singers CIC 會搞一個youth band project，俾12-18歲少年band友，由852X既成員擔任導師。非常期待可以同年青人分享音樂同埋夾band既喜悅，唔知遲D會唔會有一隊852Y呢？

Debra W.